Að uppfæra Tvix margmiðlunarspilara

Frá því að ég byrjaði í Tölvulistanum þá tók ég eftir því að það vill vefjast fyrir fólki að uppfæra sjónvarpsflakkarana sína.

Þegar við seljum sjónvarpsflakkara bjóðum við ætíð uppá að setja harða diska í spilarana fyrir fólk en látum þó vera að bjóða uppá hugbúnaðaruppfærslu. Það væri kannski sniðugt að byrja á því núna en það er bæði tímafrekt og kannski finnst viðskiptavinum ekki mikilvægt að standa í þessu.

Hvað um það, þá er það í raun mjög einfalt mál að uppfæra spilara, svo lengi sem framleiðandi spilarans býður uppá það.
Dvico Tvix er mjög öflugur framleiðandi og að mínu mati einn sá besti á markaðnum. Ég hef svosem ekki mikinn samanburð en þó nokkurn.

Hér að neðan má sjá aðferðir til þess að uppfæra spilarann á tiltölulega auðveldan hátt.

Að kanna hvaða hugbúnaðarútgáfa er í spilaranum er gert svona:

1. Tengdu TViX spilarann við sjónvarpið þitt og kveiktu svo á spilaranum.
2. Ýttu á SETUP hnappinn á fjarstýringunni og uppsetningarvalmyndin (setup) kemur upp.
3. Neðst á skjánum ætti að birtast “Version ##.#.##”  sem gefur til kynna hvaða hugbúnaðarútgáfa er á spilaranum.
4. Farðu á heimasíðu TViX www.tvix.co.kr og sjáðu hvaða hugbúnaðarútgáfur eru nýjastar fyrir spilarann þinn.

Að hala niður nýrri hugbúnaðarútgáfu:

1. Náðu í nýjustu útgáfuna á www.tvix.co.kr og halaðu því niður.
2. Tengdu TViX spilarann þinn við tölvuna þína með USB kapli.*
3. Stýrikerfið í tölvunni þinni mun skrá spilarann sem harðan disk.
4. Afritaðu útgáfuna sem þú náðir í inn á rót spilarans eða á USB lykil.**
5. Slökktu á spilaranum og tengdu hann við sjónvarp.

*Sumir TViX spilarar bjóða uppá tengingu við heimanet. Með FTP forriti má komast færa skrár með auðveldum hætti frá tölvu yfir á spilara án mikillar fyrirhafnar. Nánar um það síðar.
**  Flestir TViX spilarar eru með USB tengi svo hægt sé að tengja utanályggjandi harðan disk eða USB lykil við þá.

Það að uppfæra Tvix 6600N spilara er gert einhvernvegin svona:

1. Þegar búið er að sækja nýja uppfærslu á heimasíðu TViX www.tvix.co.kr er best að vista hana inn á rót spilarans eða á USB lykil.
2. Tengdu spilarann við sjónvarpið og kveiktu á honum.
3. Í valmynd spilarans má sjá uppfærsluna, oftast kemur hún neðst í lista. Mynd 1
4. Spilarinn spyr hvort þú viljir uppfæra. Veldu uppfærsluna og ýttu á OK hnappinn á fjarstýringunni.
5. Samþykktu uppfærsluna með því að velja OK á skjánum. Mynd 2
6. Stöðugluggi kemur upp og sýnir hversu mikið er eftir búið af uppsetningunni. 
7. Að uppsetningu lokinni endurræsir spilarinn sig og er þá tilbúinn til notkunar.

Athugið að margir spilarar sem eru með nettengingu bjóða uppá sjálfvirka uppfærslu.
TViX 6600 línan bíður uppá þann kost og er hann mun einfaldari en sú leið sem sýnd hefur verið hér.

Ef einhverjar spurningar vakna varðandi þetta hvet ég þá sem þær hafa að vera í sambandi við mig annað hvort með tölvupósti eða í athugasemdum hér að neðan.